過氣美國流行音樂天王米高積遜（MichaelJackson），大前日就以色列演唱會製作人MarcelAvram控告違約嘅官司出庭，前日案件繼續進行聆訊，不過米高竟然一度缺席，後來要人𠱁先至肯露面！點解？原來佢上庭前睇報紙，嬲啲傳媒淨係掛住影佢個鼻近距離大特寫，而唔將報道焦點放喺單官司度喎！
我大口羅拉覺得米高都幾可憐，早幾年佢貪靚係咁整容，到𠵱家撈唔掂，重搞到要出庭打官司，咁啱個鼻又唔爭氣，自然成為全球傳媒嘅焦點啦，就算佢話唔想啲記者影佢，在場有邊個記者會聽佢支笛先？
聽講米高就係因為見到啲報紙全部淨係登佢個鼻哥嘅closeup，所以嬲到玩失蹤唔肯出庭，不過幾個鐘頭之後，米高嘅律師用盡九牛二虎之力，終於𠱁番呢位過氣天王，難得米高死撐扮風騷，去到法院門口重同啲fans揮手，喺庭上又不時玩放大鏡，真係儍得有啲嚇人！