上周五膽粗粗，在美股試頂回近20日線支持時偷步買入恒指Call輪9552，今個禮拜一直捱打，難得港府周三收市後公布穩定樓價措施，昨日恒指由地產股帶動反彈，回升124點，重返20日線（現處9663）之上收市，報9740。
倉內的恒指Call輪9552亦收復大部份失地，昨日收29仙，只跌1個價位，趙飛雲心諗今次總算守得雲開見月明，短期可以伺機收割，但期指加時階段急插，原來滙豐（005）發行140億美元新股，以約3成溢價，在美國購買一間經營樓按加按等高風險借貸的財務公司Household，市場即時嘩然，滙豐股價在倫敦一度急跌5元。
大笨象一向作風穩健，突然走去行鋼線，自然嚇親人。不過，穆迪及標普不約而同即時發表利好這單交易的言論。樂觀方面諗，如果滙豐能及時成功解畫，令市場對這單交易釋疑，則不致對股價構成太大壓力，否則倉內嘅9552今日可能要輸鋪勁，運氣咁差，趙飛雲要改名做趙黑雲。
不過，束手待斃向來唔係趙飛雲嘅作風，港股今日有可能在滙豐拖累下，再加上地產股有獲利回吐而大跌。若出現這種走勢，則按既定部署，在沽出9552之餘，反手造淡買入恒指Put輪9448或9444。
美股及港股目前形勢雖然淡友處上風，但好友並非絕無翻身機會，若本周美股能及時大幅回升，擺脫調整局面，則港股年尾例旺走勢可再度重演。
趙飛雲