美國便服鞋Skechers一直搵女歌手BritneySpears幫佢哋賣廣告，而陳文媛（BoBo）最近就獲邀出任Skechers新一季Retro系列嘅亞洲區代言人，噚日BoBo就去咗柴灣影廣告硬照。
BoBo噚日着貼身褲，展示佢自稱四十一吋長嘅美腿，廣告商負責人話，佢哋首先揀出四、五位心目中適合人選，然後交畀美國總公司決定，最後BoBo憑住青春活潑嘅形象，成為廣告代言人。為咗今次拍攝工作，廣告商重向HowCollection借出一條重兩卡嘅鑽石腳鏈畀BoBo佩戴，價值幾萬蚊，可算十分隆重。
BoBo呢次做Skechers嘅硬照代言人，合約為期一年，佢話酬金好滿意：「都有接近七位數字，而且廣告商重任我攞波鞋着。」
現場所見，BoBo一對美腿果然好修長，佢話：「以前試過玩遊戲節目，俾人笑我對腳唔靚，所以咪積極減肥囉，我得閒會喺屋企行樓梯同玩跑步機，不過希望大腿重可以瘦啲。」對於有報道話BoBo早排上咗緋聞男友陳冠希嘅屋企，呢位靚女就話：「我都未睇過嗰篇報道，而且呢個話題同今日場合唔夾，下次先講啦。」
溫兆倫喺《流金歲月》入面嘅造型，尤其係嗰執頭髮，遮住三七面，好似好型咁斜視對手，實在幾難頂。噚日佢返電視城拍新劇《牛郎織女》，都話想曬黑啲轉吓形象，都算佢識諗。為咗快啲變黑，溫兆倫拍完劇重走去空地搽太陽油曬太陽，佢話：「我想曬黑嘛！邊度有太陽我就會去邊度。」
王秀琳（Mango）今日二十二歲生日，噚日唱片公司特別喺尖沙嘴某間日本餐廳為佢慶祝，Mango切過壽司製成嘅生日蛋糕之後，重同同事到卡拉OK慶祝。Mango話：「我不嬲都好少飲酒，屋企人都唔畀我飲，但我今晚會盡情咁飲。我飲酒唔面紅㗎，所以飲咗都冇人知。」
陳慧琳（Kelly）噚日喺機場現身，佢同助手一行五人去馬來西亞出席金曲獎，據知Kelly奪得大獎嘅機會相當高，而佢細佬陳司翰亦會出席頒獎禮。Kelly兩姊弟各有各忙，故今次實行喺外地團聚。