先達廣場好多古靈精怪的騎呢舖。
當二樓死角位的伯伯大喊：「四仔新返新到！」當地下手機舖十居其九以靚靚女Sales撐場之際，你有否留意到有間折頭任你開的波衫舖、有水族館賣身價值$23,800的花羅漢？這種原產南美洲、大熱於馬來西亞的觀賞魚，近日更因在廣州國際觀賞魚大賽中贏得「魚王」稱號，炒賣價更高達百萬元。嘩，先達都有得賣？冇搞錯你亦冇聽錯！唔信？即刻睇睇。 記者：陳漢榮
攝影：林栢鈞
店主Roy歎氣：「我間舖開喺二樓死角位，本來都唔緊要，話晒係先達，始終Keep到人流，弊就弊在隔籬全部都係四仔舖，就算有心嚟我舖頭買嘢，都唔敢行埋嚟啦，唔怕尷尬咩。」
有見及此，他嘗試玩噱頭博一博：「平時無客，我匿埋入舖打《WinningEleven》，諗諗吓，既然隻Game咁Hit，不如就靠隻Game嚟自我宣傳，睇吓有冇起色啦。」
大門口，簡簡單單寫到明「歡迎挑戰足球，贏我有折扣」，還列明盤口，好盞鬼：「打番局《Winning》，任你選用任何國家隊，5分鐘一局為限，和就打多舖。事前你開盤口，事後我畀折扣，舉個例，你想要7折，就讓我兩球半，Last你贏3比0嘅話，我咪畀7折你囉，你輸嘅話，都有安慰獎95折優惠，大家Happy！」
怕不怕給人說助長賭風？Roy這樣說：「唔覺喎，玩吓噱頭啫，你無厘頭入嚟話想同我玩番局都得。」顧客要讓球，擺明有你着數啫！Roy說：「喂！𠵱家你攞我便宜喎，要你讓球好應該啫，你唔貪心嘅話，可以選擇讓半球𠺝，雖然得9折，但贏面大好多。唔怕話埋畀你知，我打《Winning》超渣。」當真？
逗留三小時，Roy在門口不停宣傳，口乾聲沙也只得小貓三大隻，立即挑戰。Roy悉數敗陣後，向他們說：「幫幫手咪走住，影番張靚相好唔好？」是否在記者面前刻意示弱，不得而知，但他給予折頭，卻是鐵一般的事實。
小資料
店名：波衫舖（2樓S73舖）
時間：3:00pm至11:00pm
電話：97120205
店主濠哥之前在先達同一舖開了間精品店，生意淡薄，意興闌珊：「做到無癮咪執咗佢囉，咁啱我有朋友喺馬來西亞嗰邊搭到路，見花羅漢呢隻魚𠵱家重好Hit，咪試吓囉！」花羅漢早在兩年前興起，會否擔心食水尾？「所以咪避開唔喺太子金魚街開檔囉，斷估都無人會諗到先達會有魚賣啩？好多人都走嚟答嗲，問我點解開埋間騎呢舖！」
現在玩花羅漢的多是30歲以下的年輕人，濠哥解釋：「第一貪新鮮，雖然Hit咗兩年，但總比傳統養金魚有新鮮感；第二易養，每日餵魚糧，一星期換一次水；第三好玩，放手指喺缸邊，花羅漢會跟住手指周圍游，有啲養寵物Feel；第四夠平，三幾十蚊細細條嘅花羅漢毫不起眼，但愈大就愈靚愈多顏色，你無可能估計到佢大條咗之後會變成點，咁先夠過癮。」
小資料
店名：花羅漢公園（1樓F76舖）
時間：12:30pm至10:30pm
電話：23988956