政府救樓市立竿見影，樓價止跌回升，交投轉活，昨日股市亦大幅反彈，地產股表現最為突出。恒指收市9740，大升124點，成交就上番6字頭，有63億元。不過，現貨月期指尾市就插得好急，收9665，升幅收窄至103點，由高水20點變成低水75點，直情打到嚟咁嘅款。
臨尾兵荒馬亂，原來關滙豐（005）事。冇人估得到滙豐突然宣布單巨型收購，涉及資金142億美元（成1100億港元）。
跨國企業收購，多係好事，但市場對滙豐呢單交易就唔係咁睇，因為消息宣布後，倫敦港股滙豐股價已應聲下跌5元，拖累倫敦港股下跌百幾點。
滙豐收購美國嘅HouseholdInternational，係一間提供消費融資嘅公司，主要係向已做緊樓按、或手頭較緊嘅業主，提供無抵押貸款，攞嚟購買消費品。雖然Household過去幾年嘅盈利同派息都唔錯（對上年度每股盈利4.45美元，相對本周三嘅收市價22.46美元，PE僅5.05倍），但市場普遍認為，呢類貸款嘅風險較高，在美國經濟走下坡，樓價由高位回落之際，貸款質素更有可能會轉壞，滙豐進行如此巨型的收購，時間是否恰當？
講番個市。恒指噚日一舉而上番10日線（9672）同20日線（9663）之上，形勢本來有轉機，但今日又可能會俾滙豐拖低，大勢暫時重未明朗。不過，地產股走勢就已出現突破，長實（001）收54.0元，升1.5元；新地（016）收51.75元，升1.75元，兩大藍籌成交已達11億元。早前推介嘅新地Call輪9525，噚日搶到上0.37元，收0.355元，大升26%。另外，電訊盈科（008）整固完之後，又再上過，高收1.3元，升7仙。
呢輪好多股票都在營造底部，一突破就會出現急升，好似新地、長實同電盈嘅升勢都已確認。
另外，二三線股中，和記港陸（715）亦已經「牛」咗好耐，噚日收0.59元，升1仙，重上10日、20日同50日線之上，短線已有突破迹象，暫時阻力在0.6元，若有大成交破位而上，可追入，短線量度升幅目標指向0.75元。
郭兆誠