上星期放咗幾日假，本想到日本或台灣浸溫泉鬆一鬆，不過𠵱家咁嘅經濟環境，都係慳得就慳。聽同事講中山新開了一間水療養生健康中心，於是把心一橫決定到中山跑一趟。想不到這個水療中心竟然如此具規模，佔地約十五萬呎，既有日式溫泉池，也有具按摩作用的水療池，最重要係入場費只需40元人民幣，要歎世界，使乜去到日本咁遠呀！
記者：蕭宇 攝影：陳良 ImageGirl：Natalie
水療中心最大的賣點，是其多功能的水療池，有多達17種噴水設施，分別以不同大小的水力、形狀，從不同方位射向人體，達到按摩的效果。當中我認為最有特色的，係鵝頸瀑布浴、強力按摩浴、簾幕噴霧浴、氣泡躺椅浴及立式水湧泉浴。但對於小朋友來說，他們也不會理會有沒有治療功效，最緊要水柱新奇好玩。
喺按摩池玩了一陣，感覺好Relax、好舒服，水療中心四處也種植了不少樹木以綠化環境，還有假山假石作襯托，富有濃濃的大自然氣息。聽當地的工作人員講，這裏的顧客八成是港客，三點後最為多人，難怪乎撞口撞面都是香港人，若然想靜靜哋唔想咁多人的話，上午入場就最好啦！
經常頸梗膊痛，所以喺咁多款水療中，我最鍾意呢個瀑布浴，佢利用較柔性的水柱，對頭、頸及肩部進行按摩，藉此消除身體肌肉的疲累，據說可減輕偏頭痛、頸及身體局部疼痛，水柱射向頭及肩位都非常舒服，感覺好正。
試勻17個水療，覺得呢個強力按摩浴嘅水力最勁，利用強力水柱，在水中衝擊人體下半身的各部位穴道，除了能改善腸胃機能、血壓疾病及泌尿系統，據說還有壯陽的效用。其療效是否屬實不得而知，但對於我來說，水力實在太強，逗留分幾鐘便要離開。
呢個氣泡躺椅浴，最受顧客歡迎。躺在根據人體身形設計而成的座椅上，利用噴出的強力氣泡，達到震動效果來刺激與按摩身體，以消除疲勞、紓緩壓力。我試咗5分鐘，消除疲勞的效果相當唔錯！
這個水療最受小朋友歡迎，水池底部湧出強力水流，托起身體，令人體在無負擔的狀態下，接受水力按摩，高血壓，精神疲勞，失眠人士啱玩外，據說，女士經常玩更有健胸的作用。
呢個噴霧浴最為特別，利用三個圓管上的特殊水噴頭，把水噴成雲霧狀，從而產生大量負離子，可改善失眠及呼吸器官功能。站在白濛濛的水池中，感覺特別又好玩。
除咗水療池外，我覺得日式溫泉區點都要試一試！這裏提供多個精油溫水池，各種精油定期更換，或根據不同季節推出不同功效的精油。時下推出的薑汁精油，可治療流行性感冒、咳嗽多痰、關節痛及驅除寒氣，精油池水溫42度，能將提取自植物的精油隨熱水氣揮發，經呼吸系統及皮膚吸收，達到香薰效果。
除咗水療設施吸引外，內裏還有標準泳池區，標準池長25米，闊14米，池深1.3米，共有六條泳道，並特設一條淑女泳道，專供女士們使用，唔使同男人迫，真係設想周到。而最受小朋友歡迎的，必定是親子活動區，有專供幼兒嬉戲的淺水池、水滑梯等，而且有水泡免費供應。若購買貴賓門票更可使用健身室的設備，內裏有十多種器材足以作專業健身鍛煉，並有專業教練陳湘駐埸指導健身，陳教練曾奪97年度廣州健美健身賽冠軍。
（一）水療不宜太久，一般一小時左右為宜。
（二）患有嚴重高血壓、心臟病、糖尿病以及身體極為虛弱的人士不宜。
（三）在玩強力水柱時，避免直接撞擊頭部，時間也不要超過十分鐘，以免對被撞擊部位造成傷害。
不少由香港返中山度假的港人，都專程來這裏歎兩三個鐘，退休的賴太每次返中山都帶同孫女小欣嚟玩，讀四年級的小欣更當這裏是水上樂園。
地址：中山市石岐區康華路東段
電話：（760）8305757
營業時間：（星期一至五）9:00am-11:00pm
（星期六、日）8:00am-11:00pm
交通：由中港城碼頭乘船約個半小時到中山港碼頭，轉乘的士十分鐘可達，車費30元人民幣。
門票：（普通）成人?40；小童?27（貴賓）成人?58；小童?39
＊可使用健身室設備