早幾日我羅拉已經收到風，話米高積遜（MichaelJackson）因為冇履行到同以色列演唱會製作人MarcelAvram九九年定下嘅協議，取消兩場千禧演唱會，結果遭索償二千一百二十萬美元（一億六千五百萬港元），前日米高終於要為呢單官司出庭作證。
帶住口罩出庭嘅米高，去到洛杉磯法院嗰陣，有成幾百個fans喺外面聲援。米高其後見到法官，自然要除咗個口罩，當堂令在場人士「精神一振」！米高喺整咗容N次嘅鼻上面，貼咗一塊膠布，唔知係咪因為佢覺得個鼻就嚟跌落嚟，搵樣嘢黐住會安心啲呢？除咗個鼻之外，米高又唔剃鬚，外貌相當嚇人，難怪有外國傳媒話佢似足二十年前拍《Thriller》MV入面嗰啲殭屍！
講番單官司，米高前日雖然只係答辯十分鐘，但係都好似魂遊咁，開場嗰陣司法人員照例讀段嘢等佢宣誓，不過佢又突然打斷人哋，話後面好嘈聽唔到！原告律師指米高從來都冇為演唱會作準備同綵排，根本一直都諗住取消演出，但米高竟然話自己喺浴室入面已經綵排過，唉！