《文化委員會諮詢文件二○○二》花咗唔少篇幅講藝術文化教育、圖書館、博物館，希望多啲學生得益。
惡佬明呢排幾得閒，理由就唔使講得太明白咯，政府停建居屋，減建公屋，又講到部份基建工程要下馬，你話建築行業，下至地盤雜工，上至建築師、地盤總管，有乜辦法唔要享受清福吖。
惡佬明善於利用空閒，趁個仔放假，特登帶佢去參觀博物館，算係以實際行動響應文委會嘅政策建議。首先就係去沙田嘅香港文化博物館，裏面嘅工作人員禮貌周周，服務殷勤，惡佬明話幾多嘢睇，尤其是有個「芳艷芬展覽」，可以睇芳艷芬戲服，聽芳艷芬名曲，吸引唔少婦女長者捧場。但行完一個圈之後，惡佬明就職業病發作，邊行邊鬧，你估佢鬧乜呢？就係對博物館建築設計好唔滿意，佢認為以今日嘅建築技術，間博物館使乜要咁多條大柱（橫柱直柱），既阻礙視線，減少實用面積，亦不美觀！
惡佬明話：「呢啲政府建築師、工程師，想喺私人地盤有得撈都幾難，政府一幅空地，任佢哋搞，都搞成咁嘅樣，佢哋究竟識唔識追上時代建築技術㗎！」
睇完香港博物館，條細路重話要睇，於是惡佬明飛車過海，參觀海防博物館，行完晒之後，惡佬明話個仔學咗唔少嘢，以後要再去多幾次博物館，等佢認識文物歷史喎。