烈顯倫法官（JusticeHenryLitton）係回歸後首批終審庭常任法官，𠵱家佢已經從前線退下，改任非常任法官。做咗四十幾年法律工作，佢梗係覺得溝通藝術非常重要。噚日係佢獲嶺南大學頒授榮譽法學博士嘅大日子，烈官嘅致辭簡直係英式幽默嘅代表作，旁徵博引，由打高球講到韋伯特、愛迪生，八方一眾聽到會心微笑，讚歎不已。
烈官話自己從不打高球，因為嫌呢個遊戲太過獨家村，相反網球有來有往，雙方都發揮到最高水準，先符合溝通藝術嘅精髓。呢位鬼馬嘅法官接着又解釋精確文字唔等於墨守成規，好似韋氏詞典編纂者韋伯特，一次老婆撞見佢同女傭親吻，驚呼意外（Surprised），韋伯特竟然重得閒糾正妻子嘅用語，話「夫人，感到意外的是我們，你是感到驚愕（Amazed）！」
烈官更屢次創造不少司法界空前絕後嘅紀錄，佢老哥七十年代成為香港最年輕嘅御用大律師，亦係第一位由大律師直接委任為上訴庭嘅法官；七一年更成為最後一位戴黑色方帽宣判死刑嘅法官。
烈官同另外兩位獲頒榮譽博士嘅葉嘉瑩同彭玉榮噚日都好高興，但係嶺大校長陳坤耀就頂唔順一肚苦水，一落台就向記者訴苦，話嶺大猶如孤兒仔，政府生咗出嚟，竟然忍心畀個仔營養不良，減佢哋嘅資源。愈講愈激動，睇嚟阿董要諗計𠱁番吓陳校長先得。
傳真︰2623-9278
電郵︰