今日是我第一天正式以車手身份踏足澳門賽道試車，心情出乎意科之外的平靜，畢竟我參加的雷諾方程式也只是個慈善賽。
每個車手只有半小時試車時間，我揸得幾穩陣，以熟習賽道為主；不過去到第五圈就出現連番意外，第一次意外就被人「隊」中尾泵把，當時只係少少驚，我心諗「試車啫，使乜咁博呀。」之後到咗葉德里彎，架車又死咗火撻唔番，剩番十五分鐘都完成唔晒個試車，真可惜。事後坐低見到架戰車尾泵把凹咗，先諗到在賽車場乜都會發生，每刻都要打醒十二分精神，希望今日排位賽有好啲成績啦。
細味今日經驗，澳門賽道確實比我玩過嘅意大利賽道挑戰性大好多，喺街道鬥，兩旁冇乜緩衝區，壓迫感好大，加上係一年一度盛事，尚未開賽已感到熱鬧氣氛和壓迫感。
好彩澳門出咗名係美食天堂，我同爸爸媽媽周二已經抵埗，就趁機會試？各國美食嚟減壓，我最鍾意葡式豬膶飯同雪芭，豬膶整得好似鵝肝咁，入口好香；而雪芭就好似雪糕加冰嘅甜品，蘋果味好清新，有機會嚟澳門不妨試吓啦。
中國長城車隊車手鄧穎詩