賽車女郎一向令賽車生輝，不過噚日試賽，賽車女郎未殺到，一間有份贊助車隊嘅桑拿浴室就安排咗三位日、韓同越南嘅美女，身穿火辣辣性感裝束壓陣；其中日籍靚女就非常熱情主動，四周圍搵鄉里車手合照，不過南韓同越南靚女就悶啲，因為冇鄉里湊熱鬧。
每個傳媒喺攞採訪證時，都會收到澳門旅遊局送嘅旅遊大使公仔，公仔一套五款，都係宣揚市民對旅客要有禮貌、友善等，中外傳媒對澳門印象都好咗；港府成日都話要發展旅遊業，呢條計都值得借鏡。
今年日本傳媒派出龐大採訪團嚟濠江，有成八十人，焦點梗係三級方程式嗰七位日本車手；咁又難怪佢哋咁重視，上年日籍車手佐藤琢磨登上三級方程式冠軍後，立即人氣急升，今年重跳升至一級方程式，日本車壇期待第二位佐藤出現都好正常。