盈盛數碼（979）傳聞轉換老闆，股價即刻有得炒。近日無厘頭一支箭炒上嘅環球動力（231），亦係有新老闆登場，引來成班大陸炒家捧場。
環球動力約兩個月前，重處理緊股權糾紛問題，當時市場傳聞，代替曾公子嘅黃主席，想真正擁有間公司，但睇番近排環球動力股權變動，同埋董事會成員變更，就知道黃主席未能如願。
家陣環球動力的大股東，係一間叫做格力集團（香港）的公司，揸咗二十幾個巴仙，而格力嘅老總徐先生亦於噚日取代黃先生做埋主席。
至於格力阿媽，在大陸甚有來頭，珠海格力電器股份在大陸做空調相當出名，早兩個月被美國《財富》雜誌中文版選中，在「中國企業100強」中排行第46名。基於阿媽夠實力，成班大陸炒家追捧環球動力，所以隻股先至炒得咁勁。
事實上，隻股1個月唔夠，已由3仙水平，一口氣炒上8仙樓上，咪話唔驚人。
慕容小初