紐卡素喺絕地反擊成功，連贏三場攞到歐冠盃次圈入場券，食尾胡嘅比拿美當然抵讚。查實領隊卜比笠臣功勞更大，老江湖即係老江湖，我求大俠真係要向佢致敬。
可能你會問：唔使致敬咁誇張啩？一諗到紐記當年點俾古列治搞亂檔，卜比笠臣短短幾年就撥亂反正，已經唔簡單。前晚場波，佢冒險用賽前稱傷嘅比拿美就係有膽識表現；到比拿美完場前射入三比二，佢冇陪班球員慶祝，而係好冷靜咁對球員指吓自己個頭，擺明係叫佢哋冷靜啲，費事衰收尾。講真，佢成七十歲人重可以喺咁峯迴路轉、高度刺激嘅比賽咁冷靜，換轉係利物浦嘅侯利亞可能心臟已經……
NBA官方中文網頁最近出爐，國內球迷𠵱家可以喺網上投票，選出今季明星賽陣容。呢件事令我求大俠想起，喺前年日本棒球天王鈴木一朗就係靠大量日本球迷喺網上投佢一票，成為北美職棒大聯盟史上第一位外籍新人明星賽票王。以中國數以億計籃球迷，只要每人上網投吓我哋嘅狀元爺姚明一票，佢就算唔係票王，都肯定入硬明星賽啦！
三位喺英超搵食嘅國足仁兄，點計都係李瑋峰最失威，最近愛華頓兩場聯賽佢連後備都無份；另外喺預備組比賽又劣評如潮。睇嚟不嬲用人大膽嘅領隊莫耶斯，都已經對李瑋峰心淡。重記得佢曾經講過三個月之內要喺英超站穩陣腳……，𠵱家莫講話要上位，隨時會喺借用期滿被遣返。李兄弟，係時候盡最後努力啦。
意大利四路大軍都殺入歐冠盃次圈，國內傳媒大事褒揚，早排幾乎衰到無得撈嘅國家隊教頭查柏東尼都走出嚟叨光，高叫意大利足球重係好勁喎。計我話球會勁關查柏東尼咩事，佢顧掂自己教好國家隊重好過啦。再講，佢讚到意國球會咁勁，照計國家隊都唔應該太差，咁佢即刻自己畀壓力自己，捉蟲囉。
利物浦啱啱喺歐冠盃飲恨出局，成個陣營自然愁雲慘霧，領隊侯利亞就埋怨中場謝拉特，話估唔到佢重未能夠喺低潮中復甦，係隊波出唔到線嘅原因之一。我求大俠好相信類似言論只係開端，隊波嚟緊一定有好多負面消息傳出，將帥互相埋怨、球員離隊消息將會無日無之，紅軍躉要做好心理準備嘞。