利物浦前晚對巴素利開波無耐就連輸三球，話佢哋踢得好就勢係假；不過下半場追番三球嗰份決心就抵讚，既為球賽帶嚟刺激，又幫上盤客執番半個盤，算攞番個尾彩。
當紅軍躉或者上盤客睇見紅軍閃電輸夠三球之後，有啲應該已經嬲到熄電視瞓覺，或轉台睇阿積士對國米。估唔到紅軍下半場踢出決心，連追三球，睇唔到佢哋股拼勁就真係走寶囉！換轉第二隊甚至可能一早放棄收埋主力㖭。𠵱家紅軍專心啲踢聯賽，假如保持呢份決心，阿仙奴或者曼聯都咪話唔驚。
英國法醫官日前裁定，今年年頭過身嘅英格蘭六十年代球星阿瑟爾踢波時成日頂頭槌，直接導致佢腦退化致死，呢個消息公布咗之後，好多球員人人自危。我求大俠覺得新一代球員其實好幸福，因為𠵱家嘅趨勢係啲波愈改愈輕，對球員健康係有好處。但啲球員近年淨係識批評啲波改得太輕、太飄唔易踢，𠵱家知驚嘞啩。
澳洲網球公開賽喺墨爾本每年一月嘅盛暑舉行，場內氣溫有時高到成攝氏四十度，真係想收買人命咁滯，好在賽會都好體貼，噚日宣布明年開始，若果氣溫達三十五度或以上，室外賽會暫停。我求大俠好贊同賽會嘅做法，啲球手打出周身汗都有豐厚嘅獎金，但唔通要球迷貼錢買難受咩！
富咸老闆阿法耶茲周不時都有爆炸性發言，好似前兩日佢就建議「大圍」設立一條新例，內容係任何球員踢唔到會方對佢哋嘅要求，會方就有權唔出糧畀佢哋，甚至炒佢哋魷魚。計我求大俠話唔同球會對球員要求唔同，好難統一標準。呢位有錢佬今次咁講擺明係想暗示喺富咸踢得唔好嘅球員，隨時無得撈，使咩咁轉彎抹角？
各位NBA迷重記唔記得身高七呎七吋嘅長人波爾？今年已經四十歲嘅佢最近竟然轉行踩冰！佢噚日應承咗美國一個冰上曲棍球聯賽，會喺今個禮拜六着球衣喺冰場上亮相。我求大俠記得骨瘦如柴嘅波爾，當年係NBA連行路都好似企唔穩咁，今次要佢去踩冰，唔知佢係唔係好等錢使，竟然連自己嘅尊嚴唔要，認真係運動員嘅悲歌。
逢周一至周五見報