陳太認真鍾意同記者行家玩捉迷藏，之前問親佢對二十三條有乜嘢睇法，佢一聽到就掉頭走。噚晚陳太獲邀出席加拿大商會慶祝二十五周年活動，上台發言。
陳太原本都好正路，由佢同加拿大嘅淵源講起，話原來曾經訪問過加拿大三次，回歸前分別以經濟司及布政司身份訪問，回歸後以政務司司長身份再去多次。又提起八歲由上海嚟香港，幾十年間香港經歷巨變。講講吓，陳太竟然大談二十三條立法如何如何，特首、港人應該點做，台下一眾正在遊魂嘅記者，喺毫無心理準備之下，大為緊張，陳太突襲記者成功。
陳太走嗰陣同老公好似孖公仔，記者問陳太開唔開心，陳生搶住代答「梗係開心啦」，記者又問喜歡下廚嘅陳太，最近有冇煮番兩味，「發言人」陳生又幫佢答埋，多數係煮白汁雞皇飯同炆牛肉，因為啲孫女鍾意喎。
（圖）陳太噚晚着到鬼火咁靚，一襲金線綠花旗袍配珠鏈出席加拿大商會活動。
傳真︰2623-9278
電郵︰