大編輯熱心公益，參加「毅行者」步行籌款，其志可嘉，籌到兩萬蚊，認真難能可貴矣。大編輯行行吓，碰到成班外國人，有幾位係特地自外地嚟香港參加嘅，因為行麥理浩徑夠晒好玩喎。
其中一位外籍人係資深賓架，佢同大編輯一路行一路傾，竟然話自己有位本地傳媒朋友叫做左丁山，問大編輯識唔識得，左丁山臭名遠播，大編輯梗係識啦，當晚就打電話嚟報料，順便報告一聲：「喂，你嗰位賓架老友話又俾人layoff咗，就快離港鬆人嘞。」
唉，呢位賓架史真唔好運，二十幾年前已經喺大跨國銀行工作，被派來香港做到總裁，當時嘅董先生，現在嘅特區特首，就已經同佢好friend。賓架史因為出身長春藤名校兼精通日文，好快就俾獵頭族睇中，撬咗佢去東京，點知之後二十年，佢去到邊間銀行或者大經紀行，邊間就俾人收購，每次收購合併完畢之後，賓架史就俾人辭退，佢亦在香港東京之間來來往往，冇一次超過三年。今次份工本未好穩陣，但香港經濟實在唔好，佢嗰間投資銀行唔夠高盛、大摩、美林等競爭，於是上頭要裁員，佢屬於「高薪老人」，自不然係被開刀嘅對象。呢二十年做美資行實在辛苦，職業全無保障，以賓架史咁嘅人才都要浮浮沉沉，左丁山𠵱家重可以搵到兩餐，不敢奢望矣。