雖然港人日日愁眉苦臉，擔心呢樣，擔心個樣，但係其實香港仍然好受外國重視，好多領導去親中國搵商機，都一定係香港停番幾日。
前日澳洲南澳省省長米高蘭恩由上海嚟咗香港，佢重特登拜會特首董建華，又去見咗李嘉誠。八方笑省長乜咁醒，識得搵兩位特區最高領導人，其實超人喺南澳有投資，主要係電力方面，李生重帶咗省長去睇佢開發中嘅生化科技產品。
至於見特首屬禮節性拜訪，不過蘭恩省長乘機向老董反映啲紅酒稅太高，話會影響兩地貿易。唔講唔知，南澳以食品出名，五個人之中有一個從事飲食業，而輸出紅酒係大生意，所以唔出聲唔得。八方就笑佢講得唔合時，因為特區政府冇水，連地都冇得賣，阿松條數唔知點埋尾，重邊會有機會減，唔加都偷笑啦！
（圖）南澳省省長蘭恩唔知香港咁缺水，重想老董減紅酒稅。
傳真︰2623-9278
電郵︰