港股噚日觀望政府公布穩定樓市措施，股民基本上無心戀戰。政府今次一口氣出九招救市，主要集中在緊縮土地供應，方向正確。
現時樓市出現嚴重供求失衡，如再賣地，等如將香港寶貴資產賤賣，並拖垮香港經濟。不過，政府只是暫停賣地及勾地1年多啲，阿虎就略嫌未夠重手，若政府有意為樓市谷火，應該至少將年期延長至兩年以上，讓市場有更多時間消化空置及未落成單位。
今次穩定樓市措施對地產股是好是壞，暫時不得而知，因為香港經濟實在太差，樓價升定跌仍難以預料。
不過，新措施肯定會對地鐵（066）日後盈利產生不明朗因素，因為兩鐵要至04年才可推出新項目招標，勢必影響期內物業收益。地鐵噚日跌0.56%，收報8.95元。地鐵現時股息率有4.7%，若缺乏物業收益，相信股息率唔易維持。九鐵在公布穩定樓市措施前，何東樓完成截標，總算不幸中大幸。
此外，港府財赤問題可能因新措施而雪上加霜，到時可能令外資更加擔心，屆時所引起的問題可能比樓市持續下挫重頭痛。若政府在宣布完救樓市九招後，地產商合作減慢推盤，再加上有大戶帶頭入市炒樓，樓市或者有機會快啲翻身。
廣興國際（1131）噚日突然出現大量買盤，股價急升40.3%，收報8仙。Cookie話，此股一直有炒家收集，據聞已收得七七八八，就快有大動作。
債台高築嘅麗展（488）噚日復牌，股價勁挫21%，收報5仙。若今次救樓市措施未能令樓市回穩，麗展絕對唔易翻身。
阿虎