特區政府終於正式公布九招救市措施,以評論樓市走勢而人氣急升嘅瑞銀華寶地產分析員林奮強(洋名法蘭奇,Franklin),噚日喺會展幫香港管理專業協會演講,自然成為傳媒追訪目標,場內聽眾紛紛查問佢對樓市嘅看法。
八方聽到法蘭奇喺會上講,自己做分析地產樓市嘅工作係因緣際會。呢位「明星」級分析員話,初初加入瑞銀華寶,研究部得佢一個中國人,由於識中文對解讀本地樓市資料有利,於是就由佢做地產分析。
佢講笑話如果有得揀,或者會選擇冇咁大爭議性嘅公用股為研究範疇,但跟住就話:「兩電收費近日成為城中熱門話題,睇嚟公用股分析亦變得相當富爭議性。」
法蘭奇看市準,每年嘅最佳地產股分析員獎幾乎係佢囊中物,可惜今年俾另一歐資大行德意志贏咗。佢令八方最印象深嘅係經常語出驚人,例如法蘭奇噚日嘉許政府房屋政策清晰咗,就話以前有「幾個姓黃」嘅講說話,「都唔知政府想講乜」、「今日講X,聽日講Y,跟住又講Z」,但部長制後「開始有個姓孫(指孫明揚)」……
會上重有人問樓價同本港競爭力關係,法蘭奇答話兩者關係不大,重舉例話瑞銀華寶係本地最大辦公室租戶之一,但每年佢地畀國泰嘅錢(指員工出門公幹嘅交通費)遠較租金為巨,重開玩笑話,政府如果要幫忙外資企業減輕負擔,不如先搞搞國泰。
(圖)林奮強經常語出驚人,每年都幾乎攞最佳地產股分析員獎,可惜今年輸咗。
傳真︰2623-9278
電郵︰