孫公喺收市後公布9招救市，而董老則喺開緊市時用「果斷措施」形容救市措施。大市畀少少面過孫公，恒指冇跌到，4大地產股除新世界（017）企定外，其他3隻都有進帳。
朝早，喺地產股普遍偏軟嗰陣，相關Call輪都好硬淨，代表個市唔係睇淡。9招詳情公布後，倫敦港股有輕微嘅利好反應。未來幾日，繼續有大把專家同口水佬評論9招是否有效，唔同身份嘅人，必然有唔同嘅睇法，估計平均睇法，係中性偏好。
如果地產股變化唔大，或輕微回軟，可以諗吓執啲地產Call輪，長實輪對象係9515同9517，新地輪對象係9524同9525，恒地輪對象係9473，新世界輪則成交少同溢價過高，冇對象。呢啲地產Call輪個別喺昨日已先行一步，升幅唔細。地產股若升得急些少，例如2-3%以上，則唔值得高追相關Call輪。
中信泰富（267）噚日跌25仙，隻熱門Call輪9298跌到10.4仙低位，大量成交，有64球易手。
中信開始超賣，再跌些少，則9298值得博反彈。隻輪明年6月到期，溢價15.8%，槓桿率15.7倍，昨日下跌7%，吼住10仙邊邊買貨。
章盛