沉寂咗一排嘅蔡楓華，最近又有新搞作。禮拜日夜晚十一點幾，佢走咗去長沙灣警署報警，話俾人打，不過表面上又冇任何明顯傷痕。原來早排蔡楓華有親人過身，留低咗一層荔枝角清麗苑居屋，蔡楓華嗰日上咗去清麗苑同屋企人爭間屋，重同啲兄弟大打出手，之後佢去咗報警，警方列為家庭糾紛案處理。
𠵱家啲樓價跌得咁緊要，清麗苑層居屋市值大概七、八十萬，如果重要幾份分，真係冇乜肉食。但蔡楓華呢幾年都冇乜嘢做，經濟情況唔係幾好，之前試過連百幾蚊都問記者借，對於佢嚟講，呢筆錢都幾緊要，所以先會咁肉緊去爭，重搞到要打交。
做娛樂圈表面上好風光，但係人氣一跌就會好慘，而且心理好容易唔平衡，對於嗰啲發明星夢嘅後生仔女，蔡楓華就係最好嘅借鏡。
英皇三T小花齊齊俾林建岳投資嘅賀歲片《當老鼠愛上貓》飛起，噚日鄭希怡（Yumiko）去新城做訪問，強調自己同《東周刊》事件無關，一於劃清界線。對於冇份拍《當》片，Yumiko話：「其實係啲期就唔到，我要拍就要放棄兩個廣告，咁個廣告嘅收入多啲，加上我隻新碟重有十幾日就出，公司話要以唱片為主，都冇辦法。」
周杰倫認真厲害，佢喺下個月十三到十五號開嗰三場演唱會，原本點都唔會加場，但係因為有太多fans投訴買唔到飛，所以主辦單位最後決定加開十二同十六號兩場，即係總共開五場，今日就開始賣飛。上次賣飛四十五分鐘賣晒，唔知今次會唔會破紀錄呢？
陳秀雯同E-kids噚日出席港台活動，陳秀雯為配合遲啲推出嘅新碟，特登染咗一頭金髮，佢話對佢嚟講係一個幾新嘅嘗試，佢重話：「新碟都有好多新形象，會畀大家一個好新鮮嘅感覺。」而E-kids就話最近發覺有啲歌迷為咗佢地𠝹手，佢哋話：「我哋唔想啲歌迷咁做，不如𠝹第二啲嘢重好。」
今期《壹週刊》封面故事報道有關林建岳嘅財政情況，林建岳話對呢個報道非常憤怒，佢噚日喺電話回應話：「報道與事實不符，而且含有誹謗同誤導成份，我已經決定採取法律行動，𠵱家一切已經交咗畀律師處理，所以暫時唔會就報道內容作任何回應。」