嘉華地產馬鞍山嘉華星濤灣，計劃月底開賣，發展商同代理積極展開宣傳攻勢。發展商拍咗套宣傳短片，前日喺中原地產月會上播放，嘉華高級物業經理陳玉成粉墨登場，介紹示範單位、樓盤建築進度同規劃。
聽講，中記喺樓盤附近租咗個停車場，可以容納四百部車，免得揸車嚟睇樓要周圍搵車位咁煩。
另外，美聯喺樓盤附近居屋錦泰苑錦泰商場租咗舖位，開咗個「簡約生活展銷廳」，提供一站式服務，旨在吸引二十五到三十五歲嘅年輕買家。場內重有銀行按揭同法律諮詢櫃台，有服務大使解答買家嘅問題。
美聯重會由高級區域經理歐子軒率領八隊精英，約一百二十人配合宣傳，以達到銷促效果。中美已先後出手，其他代理行會點拆招呢？
仲量聯行搞咗一個「全球最優勝城市」研究，第一階段已經完成，研究嘅一百個大城市，根據經濟增長、房地產活動同房地產市場表現，認為表現最突出嘅三個城市係杜拜、都柏林同拉斯維加斯。
至於了解未來地產市場表現的關鍵所在，則屬第二階段嘅研究工作，第三階段會預測未來嘅最優勝城市。不過結果要明年春季先至完成。
佢哋話，初步研究結果顯示，投資者唔應該局限喺發展同增長迅速嘅城市，因為呢啲城市，只有都柏林嘅物業租金有可觀增長。
政府噚日公布救市措施，發展商早兩日已不斷開記者會，為旗下樓盤造勢，噚日有五個記者會，今日有八個，包括尖沙嘴擎天半島同港景峯、九肚山皓朗山莊、東涌藍天海岸、九龍城成龍居，同粉嶺嘅粉嶺名都。
泛海嘅深圳東門東悅名軒今日有委任簽約儀式，至於和黃一早安排嘅東莞睇樓團都喺今日出發。
二手盤同銀主盤喺一手樓低價衝擊下，長期處於捱打狀態，代理要不斷諗新橋嚟吸引買家注意。
好似卓先測量行，喺回歸前搞咗一次拍賣，請買家睇煙花。下個禮拜一佢哋又舉行拍賣會，今次會喺拍賣會完結前送出一百蚊現金超市購物券畀頭二百名到場人士。而代理行陪同買家到場投到物業，又可以獲得二千蚊轉介費。
每次帶記者參觀旗下物業，都有新搞作嘅永泰亞洲，噚日喺小欖漣山複式示範單位內請飲嘢，一杯杯又藍又綠，似足漱口水李斯德林，搞到小記們要考慮一陣先敢飲。
永泰亞洲企業拓展總監李簡鳳玲，繼九龍塘陶源炮製竹庶茅根水後，又一新貢獻，「漣山特飲」!材料有啲咩？連佢自己都無印象，但可以話畀大家知，係自製嘅雞尾酒，重有個名「cocktaildelahillgrove」!
蘭西試咗杯藍色雞尾酒，覺得幾好味，同梳打水無乜分別，比想像中好。
內地樓盤愈嚟愈多，發展商為咗促銷，紛紛仿效香港，喺現樓設十個八個示範單位，準買家可以喺唔同樓層、唔同坐向、全方位感受吓邊個單位最合心水。
內地有唔少樓盤示範單位，其實重好過香港。聽講中海喺深圳嘅中海深圳灣畔，示範單位真係令人大開眼界，例如水龍頭，廚廁分別用唔同嘅形狀，其他單位又用另外一款；鋅盆（圖三）又有好多種，有圓有方，重有其他形狀。睇得出發展花咗好多心思整靚示範單位。另外，發展商又喺示範單位隔籬嘅清水房，擺晒啲用料樣辦畀客睇，淨係燈掣都有幾款，總有一款啱要求。
香港發展商要醒定啲，否則港人一窩蜂去深圳睇樓兼買番間屋，到時港樓市想翻身都幾難。
蘭西
電郵地址：