邊個話電腦喇叭一定要四方呆板兼聲粗氣大！影院喇叭嘅名牌JBL，最近推出佢哋首套電腦專用2.1套裝喇叭Creature，一攞落旺角OnlineGame場試玩，馬上以佢可愛造型同陣陣藍光，「螢」盡全場！後來初試啼聲，喺聲音混雜嘅Game場內，再以影院級靚聲，贏得四周注目禮！屋企部老土電腦喇叭，退役都係時候啦！
記者：朱崇德
攝影：周旭文、朱崇德
ImageGirl：CoCo
鳴謝：CyberSniper
現時美國最大及著名喇叭生產商之一JBL，其最頂級的影院專用喇叭，售價動輒可達數十萬港元！所以佢今次首度推出電腦用2.1套裝喇叭，真係令唔少影音及電腦迷為之心動。
首次接觸Creature時，相信所有人都會俾佢矚目嘅外形吸引，機身完全打破傳統電腦喇叭四四方方嘅框架，如果老土啲講可以話佢係竹笋形，不過西方雜誌就話佢似經典卡通鬼魂Casper，真係愈講愈可愛！不過最特別係全套2.1套裝喇叭底部都裝有LED燈，一着機就有陣陣藍光滲出，落到OnlineGame場呢啲咁黑環境，當然係非常搶眼啦！
Creature由一對左、右聲道嘅衞星喇叭，同一個超重低音喇叭所組成，總體輸出有8W+8W+24W，對一般咁貼身使用嘅電腦喇叭嚟講，功率都算幾大！但最厲害係衞星喇叭設計非常小巧（75×75×70mm），主要是因為喇叭單元使用了罕有嘅釹金屬，同JBL專用嘅Odyssey技術，好處是一個細小嘅喇叭單元，已經可以做齊高、中、低音的全頻輸出，而且非常好炸！相對一啲一味靠大聲，但分音唔細緻嘅電腦喇叭，音色當然正好多啦！
設計另一特色之處，係右面的衞星喇叭，設有一個輕觸式音量調校掣，最細心係佢使用咗「導電」的原理作音量開關，所以只有使用導電嘅物體（例如閣下隻手指）先可以調校音量，就算平時畀本書壓住個掣，都唔會話一開機就炸爆喇叭，好細心！
唔講大家可能唔知，其實JBL呢隻Creature大有來頭，早在香港行貨抵埗之前，Creature曾錄得在美國一推出馬上賣斷市嘅佳績；所以香港都有唔少玩機一族，一直等緊呢套機嘅行貨返！所謂「最好就是最夾」，今日就等呢班發燒一族，教大家用乜嘢同3色（銀、白及藍）喇叭最夾。
家用遊戲機Sales阿猴
我一向係JBL喇叭嘅Fans，主要鍾意佢聲靚，而且玩開有感情；網上新聞知道佢出呢隻Creature，一直等緊佢呢隻銀藍色喇叭返，點解？如果用佢嚟襯部PS2透明藍限量版，真係型到冇嘢講，我諗都係時候換機啦！
Creature似……：咁有科幻Feel嘅設計，梗係似外星人啦！
Mac用家Patrick
有好多Mac用家都昅實呢隻Creature，Mac機一直跟開嗰隻HarmanKardon全透明喇叭，其實同JBL係同宗產品（同樣隸屬於Harman公司），根本呢隻雪白版Creature，就係Design嚟襯番新一批Mac機，用佢嚟夾iPod、枱燈形iMac，簡直大叫感動！聽講三色中最好賣都係白色，而且好多都係Mac用家買晒！
Creature似……：白色版有啲似奶嘴！
電腦用品Sales豆豆
最先我係見到雪白版Creature嘅！但對於一啲PC用家，可能金屬銀版會易夾色的，其實𠵱家好多LCD、Notebook同電腦周邊，都係行銀色Cyber設計，金屬銀就襯到絕啦！設計夠型、JBL名牌質素保證係佢最大賣點！
Creature似……：《玩死麥高維治》個大光頭！
查詢：思維集團
電話：29551000