久違咗嘅盈盛數碼（979），雖然近排大陸大股東被追數新聞頻頻出現，但股價則係咁升，噚日升得特別急，升18.2%，收0.13元。
經紀陳解釋，自從盈盛數碼1年前股價玩過笨豬跳之後，大股東就已經失勢，之後公司多次批股，股權分散到唔恨，直至日前，先至出現一個新大股東，家陣盈盛嘅管理層，將逐漸淡出，稍後公司會有新管理層。至於近排股價係咁升，或者係新老闆有fans捧場。不過，有一點要留意，就係原本大股東手上批貨須解決，最怕佢會趁高出貨。
小初問隻股炒唔炒得過？經紀陳話，最多係睇住個勢短炒，基本上有得執就要走，千祈咪留戀，皆因新老闆實力唔太清楚。
另外，由股壇女新秀主理嘅永成化工（850），噚日新登場股價表現非常一般，只係較招股價高出1個價位，收0.51元，但成交金額有成1.17億元，幾乎拍住藍籌股咁滯，睇怕都散到多少出街啩？
慕容小初