無睇錯，的確係$14,800，相信呢部Nokia3650係近期開價最貴嘅手機。之不過賣得咁貴就絕對唔關諾記事，皆因3650都重未出廠，最快要到聖誕，甚至分分鐘等到出年年頭先有，所以呢部3650唔係因為其他地方有得賣，然後飛返香港，係非一般嘅水貨。其實前排喺啲手機Show嘅報道都見過部機嘅實物，照王子睇，呢部機連盒都無，話唔定就係所謂嘅試版機。就算為咗先用為快而準備大拿拿拎皮幾嘢出嚟，奉勸閣下都係要諗清楚至好，話佢係水貨又唔係，更加絕對唔係行貨，部機有乜衫長褲短，真係搵阿水同你保，何況舖頭老細分分鐘當佢係鎮店之寶，未必會賣畀你，所以睇吓無妨，買就真係諗唔過。