備受車迷注目嘅新款三菱Colt，廠方終於響剛過去嘅星期一（11月11日）公布咗有關資料，而且重會響嚟緊嘅周末，於日本本土正式開售㖭！
新款Colt嘅底盤，係三菱與DaimlerChrysler合作研製而成，除用作生產全新Colt車系外，更有傳會成為Smart四座位型號嘅藍本㖭！講番部Colt，響造型設計上與早年曾於東京車展，展出過嘅CZ-2概念車相似，尤其係車頭部份就最能將呢個特點展露出來，而且重畀到人有一種既時尚又吸引嘅魅力㖭！車廂布局亦分有Warm同Cool兩款供選擇，以迎合不同用家嘅口味，當然唔少得重有齊全嘅設備配搭啦！
至於引擎方面，新車就用上分別為1.3公升（90匹），同埋1.5公升（98匹）嘅MIVEC型號，加上出色懸掛系統及剛勁有度嘅車架結構，從而可予人有出色嘅行車表現呢！有興趣嘅車迷，不妨留意我哋日後關於此車嘅詳細報道喇！