新片《哈利波特消失的密室》後日（星期五）就會喺英美正式公映，雖然未知呢部戲嘅成績會唔會超越上集《哈利波特－神秘的魔法石》全球勁收七十五億港元嘅紀錄，不過我羅拉收到料，話個個影評人睇完部戲都話拍得好過第一集噃。
今次《消失的密室》講哈仔放完假臨開學之前，收到小精靈嘅警告，叫佢唔好返學，否則有生命危險，不過佢闊佬懶理，照樣升讀魔法學校二年級！結果冇幾耐就發生怪事，身邊嘅同學無端端變晒石頭，哈仔自然要同妙麗榮恩兩個老死一齊拯救魔法學校啦！
大部份影評人都覺得部戲節奏比上集快，佢哋亦大讚片中嘅特別效果。英國《鏡報》話：「今集明顯比上集更魔幻、刺激同得意。」而《時代》周刊亦話：「嗰班細佬仔雖然冇乜經驗，不過佢哋今次做得生動好多。」
睇番部戲上周末喺英國嘅優先場票房收差唔多近一億港元，破晒舊年紀錄，各位哈利波特迷應該可以放心啩。