市場等港府宣布救市措施等到悶，似乎每到周二行政會議開會，市場都傳政府有好料公布，點知都係令市場失望。
阿虎真係懷疑會唔會又好似「八萬五」咁，已經名存實亡，等多一年半載後，阿董施施然走出嚟話：「已經冇咗勾地政策啦、居屋已經消失咗啦……。」但到時樓價可能已由高峯期跌足90%，個市救番都晒藥費。
在市場憧憬政府會推出救市措施下，港股未有理會美股周一大跌嘅因素，自低位反彈128點至9650，其後知道又食白果後，升幅收窄至32點收市，報9613。
現時社會有聲音，認為公用事業年年賺咁多錢，好應該在通縮環境下減費。政府亦暗示，希望公用事業減費。講真，若政府唔守合約精神，強行向公用事業施壓要求減價，唔知阿董以後如何吸引外資來港投資。投資者為的是利潤，公用事業嘅特性係提供穩定收益，所以公用股在經濟差時有抗跌力，只要投資者是按合約規定賺取利潤，政府就不應干預，否則就是失信於投資者。
若合約准許公用事業賺取不合理利潤，亦是政府在批出合約時的錯，情況如東江水問題一樣。政府應該好清楚，加強企業投資信心，才是香港經濟復甦之路，不應胡亂破壞合約精神，換取短暫掌聲。
康師傅（322）收市後公布盈利增長84%，成績果真不俗，但可惜乜都無得派，今日股價走勢如何，真係難講。噚日有3隻新股上市，但其中蜂蜂天然生命（8156）表現較佳，收報0.56元，較招股價高22%，成交金額達2212萬元，不負阿虎所望。不過，噚日見申銀沽唔少貨，而且股價全日維持在0.54－0.58元，上落唔大，似散貨居多。
阿虎