向來敢言嘅和黃前大班馬世民最近接受本報訪問，幾唔客氣咁批評特區政府太多干預。八方聽聞，特首睇完好緊張，話晒識咗馬世民幾十年，平時亦好老友。其實呢位支持肥彭政改嘅前大班，都認為應該對老董公平啲，因為佢份工一啲都唔易做。講到尾回歸前嘅高地價政策已經種下禍根，𠵱家人人都要老董負責；有錢嘅話：唔好畀個樓市再跌，我哋成副身家擺晒落去；窮嘅就話：個市跌得未夠低。好難做。
呢一點八方都有同感，要令所有人都開心實在冇可能。講到人人都話阿董係「老好人」，六十二歲嘅馬大班聽到個「老」字，即時成個彈起，好緊張咁話自己一啲老態都冇。佢重話同係六十出頭嘅李柱銘，睇落老過佢好多。
另外，八方之前寫過，馬世民將佢四十年前嘅行軍日記拍成電影，只會演一場。原來馬大班有心將套戲公演。都啱，部戲耗資三百五十萬美金，唔公演咪好嘥？
﹙圖﹚特首識咗馬世民幾十年，平時亦甚老友。
傳真︰2623-9278
電郵︰