雖然清水脈搏幾個星級球員冇嚟，但噚晚大球場現場依然相當熱鬧，除三樓冇開之外，一二樓座滿六成，有逾萬球迷，當中重有約六十名專程嚟港為清水脈搏打氣嘅日本球迷，可惜南華主場慘敗，冇辦法重溫上年贏清水嘅好夢！
現場球迷就好齊心幫南華打氣，每當清水脈搏球員攞波，球迷即刻報以齊整嘅噓聲，但經驗豐富嘅清水球員早已見慣呢啲場面，所以臨場發揮完全冇受影響；至於清水球迷一如以往齊備鑼鼓同主場球迷抗衡。
清水脈搏半場控制戰局之下，就領先兩球，唔知係咪球員知道可穩勝呢場首回合賽事，球員返更衣室嘅時候已經開始為熱情嘅球迷簽名留念，而下半場易邊後，清水脈搏就輕輕鬆鬆入多三球。