將軍澳中心就快入伙，發展商最近又發功催谷銷情。美聯物業助理營業董事李志誠對蘭西講，個盤吸咗唔少東九龍同港島東嘅客。佢重講咗啲有趣成交畀蘭西聽。一對在柴灣杏花邨居住嘅夫婦，同女方家人一齊睇將軍澳中心，最後齊齊入市，重買埋同一座樓上樓下共三個800幾呎嘅單位；入市原因係個盤有地鐵同會所，保值能力較強。
另外，一對分別在筲箕灣東大街，同薄扶林華富邨居住嘅兄弟，亦都買咗將軍澳中心同座嘅樓上樓下單位。
李志誠解釋，唔買隔籬單位，主要係左右單位個景已經唔同晒。
親戚朋友一齊入市嘅情況，喺將軍澳中心較多，原因係樓盤價錢平，可以負擔得起嘅買家較多。
佢又話，未有現樓睇之前，個盤以內園單位最好賣，入伙後，去貨最快就係5同6座嘅A同H室。
尖沙嘴擎天半島開售日期愈嚟愈近，代理近排密密為樓盤大搞吹風會，香港置業製作一套片長三分四十三秒嘅MTV推介樓盤，又訂做水晶摩天輪，送畀首十名透過該行入市嘅買家。
今次港置送水晶摩天輪，因擎天半島可以眺望於05年落成，高75米，位於海運大廈，是全東南亞最高嘅摩天輪。水晶摩天輪嘅造形有兩個方案，其中一個係立體水晶摩天輪，另一個方案係喺方型水晶中刻上摩天輪圖案。最終定案要等製造商回覆，有興趣買呢個盤嘅市民要耐心等待。
跑馬地樂陶苑（圖三）呢排好多成交，利嘉閣話有投資者一口氣買咗四個樂陶苑千二呎單位，埋單二千幾萬。
點知收到美聯來電，話嗰四個單位只有一間係利記做，其餘三間由美聯及港置促成，所以肯定唔係由同一買家買入。問番利記，佢哋堅持係一個買家連掃四伙，由佢哋促成嘅有兩間。睇嚟呢宗「羅生門」好難有答案。但可以肯定，實有一家代理報大數。
寫字樓大業主為吸引租客，大傷腦筋，蘭西聽代理講，上環皇后大道西有座商廈嘅業主，見大廈空置一段時間都租唔出，索性採一口價方式招租，不論高中低層都係收咁多，自然可以吸引到租客，不過梗係揀晒高層單位嚟租。
呢幢寫字樓重有幾萬呎待租。現時乙級寫字樓想要搵租客，只有減租最收效。
發展商搞記者會，最多嘢問嘅，梗係我哋一班記者。不過，噚日長實泓景臺嘅記者會，趙董（執行董事趙國雄）反而係最多嘢講，並且要考考記者。
佢一開口就拋出一句：「牢騷太盛防腸斷，風物長宜放眼量」嚟表達今日個社會多怒氣。
今次趙生就專登唔講呢句詩嘅出處，特登畀記者估吓，並且會請猜中嘅記者食飯。傳媒自然查個究竟。原來嗰兩句係出自毛澤東喺文革時代嘅七律詩，睇嚟趙生餐飯都走唔甩嘞。
蘭西
電郵地址：