「大將軍」范志毅雖然早前講過，寧願冇班落都唔想踢英甲、蘇超呢啲水平較低嘅賽事，點知轉過頭𠵱家就簽咗英乙嘅卡迪夫，有啲自打嘴巴，不過我求大俠呢次就撐范大將軍，所謂能屈能伸大丈夫也，𠵱家呢個時勢，最緊要有表現機會，打好啲實有人賞識嘅！
事實上卡迪夫目前位列英乙聯賽榜第三位，好有機會響來季升上甲組，而范大將軍亦都係因為覺得個場可以坐到二萬人嘅卡迪夫，有條件將來升到上超聯，至決定加盟呢支綽號「藍鳥」嘅球隊。范大將軍響英格蘭球壇浸淫多年，佢嘅能力絕對唔使懷疑，良禽擇木而棲，睇嚟卡迪夫得到大將軍加盟後，有望發圍矣。
曼聯領隊費格遜有份做馬主嘅愛爾蘭三歲馬直布羅陀之石，響日前被宣布正式退役，往後會用來作配種之用。我求大俠估唔到腰纏萬貫嘅費格遜會咁現實，知道隻馬有配種價值，就埋沒呢隻良駒響競賽場上嘅天份，寧願要「利」都唔要「名」。人哋話啲馬都有性，直布羅陀之石唔知會唔會因為無得喺賽場攞威，伸腳佢歎呢？
雖然下周中有個國家隊賽事嘅賽期，但係英格蘭就冇安排比賽，不過領隊艾歷臣照樣選出二十六人大軍響呢幾日集訓。米杜士堡中場格寧就響今次嘅大軍名單之中，對於首次入選國家隊，相信格寧開心都嚟唔切，但係肯定冇得落場比賽拎番頂「喼帽」，會唔會覺得有啲無聊呢？
歐冠盃首圈分組賽打到最後一日，各組出線隊伍大部份有定案，嗰啲已穩奪出線權嘅球隊，好似祖雲達斯、AC米蘭等，響比賽嘅戰意係點真係好難想像，彷彿已操控住整個出線形勢，可以輸波畀你出線，又可以贏波唔畀你出線，難為成日鼓吹嘅公平競技精神，響呢個賽制下蕩然無存！
世界盃亞軍德國隊，響下月中會同德甲聯明星隊踢一場慈善賽，而德甲聯明星隊將會由國內球迷透過電話投票選出。睇落好似好民主咁，但我求大俠知道德國足總同埋國內勁旅拜仁慕尼黑等，都同德國電訊公司有商業上嘅關係，唔知呢次用電話投票，會唔會係假民主、真搵錢，收你每六秒六毫呢？