梁朝偉昨日拍攝賀歲片，並透露女友劉嘉玲近日都留在家中休息，他不用開工時就會陪女友。偉仔又認為人有三衰六旺，要以平常心面對一切。對於會否把這些經驗跟嘉玲分享，偉仔說：「凡事要自己去領會。」
梁朝偉、楊千嬅、鄭中基、方力申及李彩樺等，昨日在天后趕拍賀歲片《行運超人》，心情甚佳的偉仔，更與記者大談女友劉嘉玲的近況。
偉仔表示近日因忙於拍攝新片，故此沒有時間陪伴嘉玲，他說：「我日日都俾狗仔隊跟住，好辛苦，好多私人嘢都做唔到，我又唔可以去做運動，因為俾人睇住好唔自然同有壓力，如果約朋友又怕影響到人哋。不過一旦唔使開工，我都會返屋企陪嘉玲。」對於最近有消息指偉仔會陪伴嘉玲到內地接拍一個美乳霜廣告，他否認說：「邊有呢件事，都唔關我事。」
偉仔一向篤信白龍王，問他近日有否要求白龍王指點迷津，偉仔說：「我見佢唔會問呢啲嘢，命運係受自己性格影響。人冇可能一世冇是非，衰嘢梗會有，要平穩着陸，唔好一下起，一下跌落去。人有三衰六旺，要珍惜𠵱家有嘅，做好啲，好嘅時候要積穀防飢，三衰時都要減到最輕。人要長大，要以平常心去面對，你估我重係『再見十九歲』咩？人有情緒好正常，要從生活中學習。」
對於會否把這些人生經驗傳授給嘉玲，偉仔說：「凡事要自己去領會，自己去調整。」
而偉仔的另一好友梁家輝，近日涉嫌醉酒駕駛，並與城巴司機發生衝突，不過偉仔相信家輝不會動手打人，他說：「我唔知，當時又唔喺現場，但我認識嘅家輝唔係咁火爆，從來都冇見過佢飲醉酒。」
此外，鄭中基昨日反串扮女人，他戴上假髮，並與緋聞女友楊千嬅合照，而劇情則講述鄭中基在胸內收藏了偷聽器。而方力申與李彩樺則穿上軍裝客串演出。