啱啱晉身為藍籌公司主席、「大美人」林青霞嘅夫婿邢李㷧，噚日首次就思捷環球躋身恒指成份股開腔。佢同八方講，雖然呢件事聽就聽咗好耐，但始終係一件值得鼓勵嘅事，希望能藉以擴闊股東層面咁話喎！不過，佢話被選為藍籌比唔上購入美國業務、一統品牌咁開心。
心情勁靚嘅邢李㷧又話，會食餐勁去慶祝，重一食就食夠五餐㖭！佢噚日又趁機向新聞界介紹新非執董鄭明訓，更講笑話叫鄭明訓入嚟，主要係教佢打好啲高球！鄭明訓爆料話邢生心頭好高，目標係想打到七十二桿。
邢李㷧話因為啱啱先卸下思捷行政總裁一職，𠵱家重了解緊單做主席係點嘅，會向其他主席請教心得，佢又話未來無意將個寶貝女安插入集團內，𠵱家同個女講得最多嘅係教佢點樣分手，最緊要分得「漂亮」喎。
﹙圖﹚邢李㷧話要食五餐賀公司加入恒指成份股。
傳真︰2623-9278
電郵︰