本欄十一月六日講「鄧白氏調查」，即刻引起「鄧白氏」嘅關注，一位FloraNg（市場傳訊部）小姐連續傳來兩封電郵，解釋鄧白氏嘅調查方法，Ng小姐又話可以向顧問K接觸，以免誤會。顧問K知道之後，話費事麻煩，亦唔想有人因此而受內部「照肺」，今時今日，做事要留有餘地，唔好壞人飯碗喎。據Ng（吳、伍、黃都得）小姐講，鄧白氏喺全世界每日要更新十萬計嘅公司資料，大量訪問員用電話訪問、更新數據。訪問員受過嚴格訓練，要重複核對資料，確保無誤，例如你講208Queen'sRoadCentral就係喺上環區，唔係中環區（Central），大道中二十一至二十七號（21-27Queen'sRoadCentral）就係中環區嘞；兩間公司同樣在大道中，但地區就不一樣，所以訪問員聽完Queen'sRoadCentral，重要問多一句：「喺邊區？」呢個解釋，可以接受，但被訪者講完地址，要逐個英文字串番，的確有「煩親」嘅感覺。以前肥佬黎講「顧客服務」，成日掛在口邊嘅就係：「做乜嘢都要先從顧客角度睇，方唔方便；唔好從自己角度睇，做嘢點樣先至掂。」嗰啲對客人講：「我哋規矩係咁、程序係咁……乜乜係咁」嘅公司，失去競爭力，係遲早嘅問題，如果同肥佬黎拗，俾佢炒魷都似。
又，一位朋友問董橋才子喺十一月一日寫到一位TinaBrown，究竟係邊個。據左丁山所知，呢位英國女作家兼著名編輯，1992至98年，係NewYorker嘅主編，聞名大西洋兩岸，得女皇頒授CBE銜。