吳君如主演嘅電影《金雞》將會喺BoxingDay（下月二十六日）上映，電影公司大搞宣傳，做咗好多君如性感搞笑人形紙牌，擺放喺各戲院大堂嘅當眼處。不過最好笑係佢哋貼咗好多君如大相喺男廁尿兜上面，男士一邊如廁一邊望住君如張相，然後辦辦下事之際，君如就會突然同你講情話。
原來電影公司安裝咗一啲「電子感應發聲器」喺廁所，當感應器感應到有人時，就會播出聲帶。君如話：「今次咁宣傳好有創意，我重度咗句對白同錄音，大家去廁所時小心俾我嘅情話嚇親喎。」個感應器喺嘉禾戲院擺咗幾日，反應唔錯，不過好多人都話俾君如嚇親，而唔係俾佢啲情話冧到。
其實君如今次喺《金雞》唔止造型搞鬼，套戲嘅內容都幾好笑。內容講君如七十年代已經做舞小姐阿金，接過唔同階層唔同類型嘅客，到九十年代做揼骨妹，偷睇過天王褲襠底，之後開一樓一，重暗戀葉繼歡㖭，都幾傳奇㗎！
電影《英雄》入面李連杰叫無名，甄子丹叫長空，呢兩個名都係導演張藝謀諗嘅，咁啱同馬榮成出嘅漫畫書主角同名。張藝謀見咁啱得咁蹺，又覺得古裝漫畫書嘅銷量唔錯，所以搵咗馬榮成做主筆，幫《英雄》畫漫畫。本漫畫會喺下月推出，重會分幾期連載㖭！
台灣天后李玟前晚同家姐喺赤鱲角機場出現，問李玟兩姊妹由邊度返嚟？李玟話：「我哋啱啱喺內地三亞拍完廣告返嚟。」唔知李玟係咪賺咗錢，所以心情特別靚，佢見到記者都蓮子蓉咁嘅面口。
已作個人發展嘅Beyond三子，為紀念Beyond下年組成二十年，於是近排成日聚埋一齊。日前佢三個一齊接受商台《組Band時間》訪問同夾band，其中三個都因為個人目標一一達到而好開心，而最得意嘅當然要數黃貫中，有位靚女友朱茵不特止，出碟成績又理想，前排重喺紅館開埋個人演唱會。不過講講吓，家強同世榮就批評起阿Paul，家強話覺得佢愈來愈激，世榮就話佢愈來愈有個性。
張衞健噚日接受商台節目錄音訪問，大講追女心得。問張衞健點追現任女友張茜，佢話：「每一個女朋友都冇追嘅，我哋係互相放吓電，眉來眼去，言語上都有少少嘅，不過通常我會畀電話人先。」問佢覺得自己有乜嘢吸引女仔，佢話自己夠真誠同真心，而且佢好錫女朋友嘅屋企人。張衞健重話擇偶條件係對方一定要專一同埋孝順。