趙飛雲前日心存僥倖，希望周一晚美股及時回升，打救倉內恒指Call輪9552，誰知事與願違，美股周一晚全面急挫，杜指大跌178點，收8358，納指更跌近3%，收1319。
昨日心想港股會跟隨大跌，9552今次要輸鋪勁，但恒指只是低開50點，便反覆回升，最後倒升32點收市，收9613。雖說周一港股跌幅較美股上周五跌幅為大，可當為預先反映美股跌勢，但大戶若要質低港股，昨日應借勢出擊，淡友攻勢有所保留，到底係因為未儲夠淡倉，還是意味有利好消息跟尾？
從技術角度來看，杜指及納指經周一大跌後，兩者的20日線均告失守，同時MACD線亦回頭貼住訊號線，形勢相當險峻，若周二晚美股再不及時大幅反彈，則今次升勢可能完結。相對而言，港股形勢更險峻，昨日雖然回升32點，但其實對技術走勢全無幫助，反而10日線跌穿20日線，初步出現「死亡交叉」的利淡訊號。
雖然現時好友牌面輸足8成，不過，趙飛雲昨日見港股企硬，以及外圍美股期指造好，所以仍未投降沽出恒指Call輪9552，再次希望周二晚美股能大幅回升，扭轉劣勢，港美股市齊齊完成調整，再試高位。
另一方面，亦要預計美股繼續下跌，後市持續試低。若出現這種情況，則按周一部署，沽出9552止蝕，並伺機反手買入恒指Put輪9448，炒一轉超短線。
趙飛雲