昨日掛牌3隻新股中，果然以蜂蜂天然生命（8156）表現較好，收0.56元，較招股價高出22%，成交亦夠晒熱鬧，有貨者真係執到餐茶，但高位撲入者，就要坐一陣。不過，大陸炒家胃口大，斷估冇咁快收手，應該重有一陣玩。
今日又有3隻新股上市，經紀陳又有古仔講，佢話3隻新股中，唱得最犀利話有得炒，就係永成化工（850）。永成Size都係細細粒，每股0.50元，發行1.02億股新股同舊股，集資淨額只係2310萬元，但公開發售方面有30.4倍超額認購，配售方面亦獲1.7倍超購。
經紀陳話，今次為永成揸fit人，係一名股壇年輕女新秀，之前力作有滙隆控股（8021），當日隻股嘅表現，一眾炒家應該重有印象，今次佢由創業板轉戰主板，唔知表現會如何？
至於另外一隻新股必美宜（379），亦擺出一副戰鬥格，但幕後炒手作風向來兇狠，要賺佢錢相當困難，不宜亂掂。
慕容小初