好耐冇見歌神「技安」，佢劈頭第一句問有冇工介紹？「技安」係波鞋舖TopSales，又唔係做登性虐待照片周刊嘅員工，做乜要搵工？原來「技安」早排被假卡黨呃咗批貨，老闆唔Like，所以要諗定後路。
話說靜咗一輪嘅假卡黨又再出動，據「技安」講，假卡黨今次規模大好多，總共十幾人，分成兩三人一小隊，以夫妻或朋友名義出動，通常係蠱惑仔金毛裝扮，年過三十，一個禮拜連續七日幫襯，每次都襯唔同嘅拍檔，可以用唔同嘅卡，被揭發機會就相對地低。佢哋唯一共通點，唔用銀包，每次從褲袋抽出就只得一千蚊紙同信用卡一張，通常買親就同一個款買幾件，起碼兩三千蚊貨，然後自言自語：「死喇，唔夠Cash㖭。」好自然就用卡，而隨身攜帶一千蚊紙，作用令人感覺佢哋係有錢人，令店員減低戒心。
「技安」一個禮拜內被佢哋碌走大批關刀，貨價近兩三萬，直至一次其中一黨員留低本周刊，「技安」多手翻閱，竟見佢哋喺周刊上做晒記號，Mark低邊款鞋要邊對Size要幾多數量，恍如藥單，原來假卡黨手持本雜誌照單「執藥」，唔怪得唔使試鞋。
技安：「佢哋重Mark低掃好多玩具，到底佢哋掃啲貨去邊？係咪去第二間舖賣？希望差人做番啲嘢，唔好淨係識得支持演藝界喇。」