有「公職王」稱號嘅立法會早餐派議員陳智思，噚日喺理工大學一個講座上，呼籲出席嘅百幾個學生要多啲接觸社會，先會發現世界原來係咁大。
話說佢做咗社聯主席之後，試過扮社工跟真社工「蒲D」，去荃灣一間特別多學生嘅Disco開吓眼界。當晚除咗Disco出面有警察，「入邊一批係社工，一批係黑社會，大家有同一目標，就係『搶客』！」
陳智思話估唔到間Disco凌晨四點先最旺場，但慨歎原來好多學生玩天光，跟住返屋企梳洗之後就返學。佢又試過一窺夜青生活，發覺自己除咗識得同佢哋講聲hello外，就唔識點溝通。
講番陳智思，佢喺大學時主修藝術，所以𠵱家有時間都會畫吓畫，大家應該會記得佢自創用塗改液代筆同顏料創作。佢話藝術雖然唔可以維生，但可訓練思維，「啲人話我咁都叫畫？Butitworks！」
雖然公職好多，但陳智思堅持有兩件事必做：第一件係每星期有三晚陪靚靚新加坡籍太太，𠵱家為咗兩歲幾嘅仔仔，重逢星期四晚都上堂學教仔；第二件係日日要做兩個鐘頭運動，重話「做運動好似吸毒，唔做成個人都唔精神。」
傳真︰2623-9278
電郵︰