本港寫字樓租售市道好似好番少少，但聽講實情係上個月傾落嘅deal今個月埋尾，咁咪畀人感覺好過上個月！
由於12月係聖誕假期，市道會較靜，所以代理都盡量喺今個月做多啲成交，估計市道會較上月活躍。
蘭西聽行內人士講，金鐘海富中心最近有個單位租咗，業主畀一個幾長嘅免租期個客，好似超過半年，但單位呎租10蚊，咁計落淨呎租就跌穿雙位數。
點解海富嘅呎租咁低？據講係物業大堂入口附近多店舖，環境較雜，加上樓上單位入口設計又麻麻地。
當然，有冇裝修都好大影響！若果唔係，隔籬遠東金融中心空置率有兩成幾，但有裝修單位可以租到15蚊一呎。
另外，金管局早前話，會將中環國際金融中心二期總部多出嚟嘅樓面放租，市場盛傳呎租勁低，大家都擔心會影響個市。若果屬實，最慘就係揸住國金二期嘅新地同地鐵嘞。
美聯精英會成員，啱啱喺泰國「充電」返嚟。
充電期間，當然唔少得大吃大喝，有魚翅燕窩落肚之後，即刻諗到做新盤嘅秘密武器。想知佢哋有乜好橋，要等尖沙嘴擎天半島二期，同西半山寶珊道一號開盤。假如條橋收效，相信黃主席要大破慳囊，多啲請下屬飲飲食食至得。
「有人話：太陽底下無新事。其實，只要換一個角度睇，生活處處都有新發現」。你可能唔知蘭西講乜，事實連蘭西都唔佢講乜。因為呢句嘢係喺香港興業記者會邀請函裏面見到。
香港興業話，今次記招主題係1000000之謎解讀，同時會畀大家親身體驗一個嶄新概念嘅生活空間，同埋介紹藍天海岸嘅規劃。
不過，查探之下，呢個1000000同樓盤嘅售價完全無關，蘭西諗，會唔會同綠化有關呢？要等禮拜四先至有答案。
噚日九倉搞咗個遊船河，帶一眾代理同傳媒坐太平洋公主號，喺海面欣賞擎天嘅真面目。
活動舉行之前，黃光耀就話嗰日係好日，原來係黃生牛一，代理收到風好識做，一早準備好賀壽禮物畀米飯班主。
中原好有心思，搵咗個同事，親筆畫張生日卡（圖四）送畀黃生。張卡左邊係Q版漫畫，有主角黃生之餘，細心啲睇，旁邊有三個CatGirl（貓女郎）。
黃生見到卡上女郎，重打趣咁話，你哋點知我想要個女。不過，大家唔好諗歪，黃生嘅意思係想追個BB女，所以生日願望係「今年努力做嘢，明年努力做人」。
最近市場傳有一家跨國測量師行裁員，行內人士同蘭西講，測量師行以前最好搵係做投資部同商業部，底薪高，福利好，佣金又多。但今時唔同往日，呢啲部門𠵱家時時拍烏蠅，好自然成為開刀嘅頭號對象，聽講有啲行係成個部門摺埋。反而做物業管理同估價嘅部門，因為生意穩定，所以影響不大。
咁測量師有乜出路呢？好彩嘅，就過檔去發展商，有啲就北望神州，同其他顧問公司合作。
蘭西
電郵地址：