中國嘅醫學技術喺富商鄭裕彤心中，原來好落後，重係停留喺「赤腳大夫」嘅年代，所以佢早喺八六年已經送咗第一批內地醫科人才去美國加州大學醫學院深造，每年都有二十幾人，希望佢哋接觸外國嘅新技術新研究，學成後貢獻祖國。
豈料，好多人去到美國後都一去冇回頭。鄭博士話：「當時因為八九年民運問題，有好多人唔返嚟，我個心好唔高興。」所以最後索性改成資助佢哋嚟港大交流。
彤叔真係有心人嚟㗎，十年嚟加加埋埋捐咗成四、五千萬人民幣，最近又捐咗一千萬人民幣畀清華大學醫學院，同香港大學醫學院合作發展醫學，噚日重去咗北京清華簽約㖭。
原來彤叔一直都唔敢喺內地睇醫生，直至一個經歷先令佢改變；話說今年年初佢返家鄉順德時有啲感冒，沖熱水涼嘅時候重暈咗，搞到要俾人送入醫院吊鹽水，醫院嘅水平令佢大為改觀，重笑住咁話「都可以信賴，有啲水準，愈嚟愈有水準」。
所以彤叔話要長遠支持中國醫學係啱嘅，「自己唔喺度，都會交帶個基金每年捐錢繼續支持」
重有一個好消息，就係彤叔最近聯絡到幾個當年返咗祖國發展嘅醫生，佢哋唔少做咗醫學院院長，咁又真係值得佢老懷大慰嘅。
（圖）鄭裕彤同港大醫學院副院長葉秀文講，希望有百幾年歷史嘅港大醫學院可以協助清華發展醫學。 張志華攝