今日有3隻新股掛牌上市，相信市場焦點一定放在蜂蜂天然生命（8156）身上，皆因有大陸炒家拍晒心口，話一力照起，引來大批fans入飛捧場。經紀陳估計，蜂蜂可能係近期新股最精采一隻。
蜂蜂今次以0.46元，發售1.12億新舊股出街，集資淨額雖然只得4416萬元，size細細，但公開發售部份有成77倍超額認購，配售部份亦有2.8倍超額，其中3000萬股，更由中糧國際（506）阿媽中糧集團要咗，大家數數手指，都知道街貨實際上有幾多。
經紀陳話，市場傳聞有間專做上海客嘅證券行，周圍硬銷蜂蜂。講句真，若然大陸佬肯抬錢嚟，唔使出口術都一定有得炒，即管睇吓今日隻股嘅表現。
另外一隻今日掛牌嘅泓鋒國際（2309），經紀陳話係大檸檬繼朗迪國際（1142）後，另一力作。小初唔明，朗迪掛牌兩日，仍喺招股價1元附近牛皮，尚未見有炒味，咁快又另開新戰線？
慕容小初