一直備受車迷關注嘅新款寶馬5系，歐洲方面最近就有最新嘅消息傳出；消息指新車不但造型及車廂空間，均較原有型號變得突出同寬敞外，而且重會採用全新嘅引擎配搭㖭！
從預想圖中可以睇到，新版5系嘅造型與同廠屬旗艦級嘅7系房車極為相似，當中一對獨特頭燈組合及鬼面罩配搭，就最能夠將呢個特點展露出來，而全新尾燈組合，亦能給予尾隨車輛有明確提示呢！至於車廂空間方面，由於車身尺碼較現有5系來得更大，故此能為車上乘客提供有更闊落嘅車廂空間，而且重會配用一套經過改良嘅i-Drive系統，從而令車上乘客，喺使用車廂設備時會來得更方便。
另外，廠方不但會為現有引擎配搭作出改良，同時又會加多一台全新2.2公升引擎，並附有最新嘅Valvetronic技術，再加上全新嘅懸掛系統，從而令新車有更出色嘅性能表現；新版寶馬5系，快者可望於明年9月舉行嘅法蘭克福車展中現身，各位有興趣嘅車迷，不妨耐心多等一會喇！