荷李活玉女雲露娜維達（WinonaRyder）單偷竊案，上星期被判兩項罪名成立，唔少人都話雲露娜唔自愛，教壞細路。不過奇怪嘅係，好多明星都冇因為咁而避忌吓，反而重自爆曾經偷過嘢，原來「三隻手」藝人唔止雲露娜一個！
好似妮歌潔曼（NicoleKidman）咁，佢話細個嗰陣，因為阿媽唔肯買個Barbie公仔畀佢，所以佢靜靜雞喺玩具舖偷咗個返屋企，當時佢得四歲咋陰功！而平時扮特務007不知幾英嘅皮雅斯布士南（PierceBrosnan），當年都做過賊，喺超級市場偷過一隻手鈪。美國女歌手Jewel亦唔好得去邊，佢話自己細個因為冇錢買糖，所以試過偷零食。
不過講到最離譜都係花拉科茜（FarrahFawcett），佢曾經喺七○年因為兩次高買被捕，搞到上差館！其實我羅拉覺得，𠵱家社會風氣咁敗壞，啲明星重公然話自己偷過嘢，重好似好醒咁，真係唔要得！