「魚賈鮑玩、魚茭似漆斷絲蓮、憶苦思甜……」
這一系列鬼馬名稱其實是陳任（阿Joe）最近推出的私房新菜。貴為食家又是寫作人，阿Joe的飲食創意可以講是源源不絕。他周圍去試菜，自然愈食愈嘴尖，於是決定親自下廚，追求自己的美食，當中的「至尊鴨」更是得意之作，他開的菜館剛推出新菜牌，要試創意無限的新菜式，請先落Order！
記者：陳冰麗
攝影：林栢鈞
阿Joe其中的一款得意之作「至尊鴨」，花了八次的研究及試味才合乎自己心意，難怪連名食家唯靈、梁玳寧品嘗過都讚不絕口。
火鳳舞解作燒雞，太行山之東就是山東，即山東燒雞之意，是冷盤的一種。將雞髀用醬油調味後，炸至金黃熟透，拌入紹酒、花椒、薑、水等再略蒸至入味，待凍後撕成絲，可混合菜絲同食，加埋鎮江醋、蒜茸等更惹味。
阿Joe喜自創菜式，試過涼瓜炒節瓜，發覺兩者並不配合，最新研究出娃娃菜釀苦瓜，娃娃菜鮮甜，與帶苦的苦瓜成強烈對比，食時定當細意回味，要先苦後甜，抑或先甜後苦，自己揀啦！
魚茭非魚膠，而是茭笋釀上豬肉碎，另外還有釀蓮片，最特別是所釀的魚肉加入了鹹魚茸馬友在內，梅香的馬友，滲入肉碎當中，食落更惹味及香口，佐酒一流。
即獅子頭，傅統做法是紅燒，阿Joe則用了清湯及合時的蟹粉一同煮，令味道更清，食到獅子頭的原汁原味之餘，還能飲埋鮮甜味十足的湯底。
黑椒炒蟹是地道星馬菜式之一，配以黑椒碎一同乾炒，入口非常香濃惹味。阿Joe自馬來西亞食過一次後即深深愛上，所以也希望同大家分享，阿Joe更話，名食家唯靈試過都讚不絕口。
廚藝一向有口皆碑，又被人稱為食家的阿Joe，並非浪得虛名。他鍾意品嘗美食，但更愛煮食，自十四歲起就對煮食有濃厚興趣。
「細細個我就好為食，記得當時屋企有個順德工人，佢煮嘅順德菜好好味，我好想學但因為當時重係小朋友，唔識點問佢好，所以我惟有邊食邊從中偷師，煮吓煮吓自己亦開始掌握到少少竅門。」
有今日如斯的廚藝，阿Joe稱除憑自已的鑽研，亦有賴岳父的指導。
「七十年代初，我娶咗家陣嘅老婆，多得廚藝了得嘅岳父教咗我好多烹飪基本功夫，我家陣煮嘅餸菜一半都有佢嘅影子。」
阿Joe大約兩個月左右就會重新設計過新菜式，更遞上他今個月的新菜單畀我睇：「火鳳舞太行、黑椒橫行錄、憶苦思甜……」小記有點兒迷茫之際，阿Joe即解釋，火鳳舞太行即山東燒雞；黑椒橫行錄即黑椒蟹；憶苦思甜是娃娃菜釀苦瓜，其餘重有歲首獻元寶、綠波蕩漾，即分別是上湯年糕浸雲吞及臭草海帶綠豆沙。
「以鬼馬古怪作為菜式名稱，目的係想大家喺未食之前可以先估吓會係啲乜，多個話題食時就無咁悶。」
「我做嘅呢隻鴨靈感源自百寶鴨，不過百寶鴨畀我嘅感覺較膩，於是乎我就將佢加以改良，唔用鹹蛋黃，改用切碎嘅內臟好似腸、肝等及半肥瘦豬肉碎、葱頭、洋葱等一齊爆香後，塞入鴨裏面，再以白鑊將鴨煎至金黃色，然後加埋秘製醬汁燜約2小時。」
當上菜時整隻鴨當眾切開，由鴨胸湧出的香味撲鼻而來，不期然吞了啖口水。試過之後覺得鴨肉好夠味，軟腍香口，但食落又不覺肥膩，個汁更是精華所在，非要撈飯不可。
名人食坊
地址：中環士丹利街66-72號佳德商業大廈1字樓
電話：28510600
價錢：最少6位或以上，每位$250-$280
預訂：有三間房在內，最大一間可容納15人的飯局，其餘至少亦可坐10人，連廳在內最多可開八席，分兩個時段，最早晚上6:30開飯，接下是8:45左右，須一日前預訂。