皇馬、阿仙奴同埋AC米蘭呢幾隊季初長勝之師先後下滑，呢期歐洲以西甲馬略卡最巴閉，近六戰全勝。嚟自拉科魯尼亞嘅借將彭迪安尼喺禮拜日又省入兩粒，弗到漏。不過我求大俠奉勸馬略卡咪用得佢太盡，至怕呢位仁兄踢得咁好，好快俾拉科收番咋！
彭迪安尼以前喺拉科多數做後備殺手，間唔中就會喺歐冠盃發威。近兩場佢一共入五球，成為西甲風頭躉，如果再咁落去，拉科唔提前收番佢就勢係假，假如我係教練就一定畀佢留吓放吓。話得說回來，雖然馬略卡連贏，之但係佢哋最近嘅手下敗將實力唔算太強，嚟緊下場作客對巨人殺手桑坦德先算係真正考驗嘞。
韋健遜執掌新特蘭後隊波果然有起色，前日佢哋主場對熱刺隊時班波不知踢得幾有決心，對手熱刺喺呢方面就輸晒囉。最勁重係連好耐冇波入嘅菲臘斯都識得入番波，相信隊波有排上。我求大俠同時發現喺巴拉福特回收嘅樸達近兩場踢得唔錯，絕對勝任雷拿個位，都算係幫新特蘭醫病嘅仙藥之一。
嚟緊嘅歐冠盃每日兩場重頭戲，將會分途響ESPN台同埋STARSports台直播，而唔會再好似以前咁，如果想睇晒兩場波要捱到朝頭早七、八點，第日返工唔變熊貓至奇。呢個安排固然令波友唔使捱夜捱得咁辛苦，重可以滿足啲鍾意㩒電視，想同時間睇吓呢場，又睇吓嗰場嘅波友。我大俠就覺得呢個安排唔錯嘞，你又點睇？
科木喺禮拜日輸畀博洛尼亞後，會長比索斯賽後話不滿球證亂判十二碼累到佢哋輸波，重激到即時宣布辭職抗議，唔再參與呢個恰細球會嘅小圈子遊戲喎。球會高層鬧人就成日有，但好似佢咁激就真係少見。鬼叫佢哋科木唔係大球會咩，如果件事發生響米蘭雙雄、祖記同埋羅馬肯定又係大新聞，比索斯今次壯烈犧牲，恐怕都難引起太大迴響咯。
原本以為「大郅」加盟快艇之後，佢嘅出場機會點都會比喺小馬個陣時好，點知季初六場比賽佢坐咗四場冷板櫈，俾快艇投閒置散；鬼咩，快艇個中鋒奧羅獲根迪今季打得比預期好，「大郅」出場時間咪大打折扣囉，加上「大郅」身價又平，擺喺度當後備都好抵㗎，咁快艇又何樂而不為啫！