馬主H去上海見到唔少以前響香港撈嘅老友，因香港不景，紛紛北上找尋機會；其中一位已經上咗去近十年，幾年前創業做市場調查公司，現在叫做企穩陣腳，有啲客路。呢位老友記寫咗封信畀馬主H：「這幾年征戰中國，終於成就了自己的小生意；但箇中艱苦，實非外人能道。香港政府鼓勵港人北上，又不實行實戰指導（可能政府也不懂在中國做生意的奧妙），那些盲目北上的香港人，很可能會死無葬身之地！」嘩，幾乎俾佢嚇親，膽小者要移民上海創業，千萬小心。
以前從上海南下靠教跳舞而創業成功嘅，有一位張正先生，即張亨利。左丁山較早前提過張先生嘅大名，一位讀者HazelChan來電郵話七六至八○年間，曾跟過張先生學跳舞，近年曾嘗試搵另一位社交舞教師，但始終唔及張先生教得咁好。佢想話（一）知道張先生墓地，前往拜祭，以示敬意。（二）張先生有冇傳人，仍然在香港教跳舞？
好抱歉，兩條問題都答唔到你，左丁山不知張先生墓地，自己亦覺難過。張先生逝世前幾年，與左丁山失去聯絡，所以唔知佢有冇傳人。諗咗好耐，記得張先生生前一位高足經常做佢助教拍拿嘅係姜煥英小姐，得張先生真傳。《蘋果》讀者全世界都有，如果有人識答HazelChan嘅，請告知左丁山。