Canon嘅數碼相機市場策略分配得好平均，繼之前高級機D60及入門機A330、V3等見街後，今次輪到中價機登場。呢部PowerShotG3挾住G2叫好叫座之勢而嚟，好多用家都期待新機表現，今次Canon行貨重打破定律，G3未正式推出，已經知道行貨將會快過日本到貨㖭。
記者、攝影：徐影龍
ImageGirl：Kelly
日本暫定喺十一月尾推出PowerShotG3，不過據香港Canon表示，今次行貨應在下周尾就會有貨派街（約十一月中旬），即係香港用家比日本更快買到，此舉對走慣水貨新機嘅舖頭打擊不少。據旺角某水貨舖人士講，對上PowerShotG2機能強兼水貨夠快，銷售非常理想，本來今次新機都諗住大手入貨，不過當知道行貨會快過日本時，登時一盆冷水照頭淋，惟有打消入貨念頭。
感光元件：400萬像素CCD
變焦：4倍光學（配數碼為14×）
快門：15至1/2,000秒
儲存媒體：CFTypeI&II
體積：121.0×73.9×69.9mm
重量：約410g
對行貨火速抵港，香港Canon十分自豪，據發言人之一嘅Tony講：「近年日本普遍都唔會留住新機畀自己賣，因為外銷定單數量龐大，經濟不景氣嘅日本唔會再獨食，所以全球同步已屬大勢所趨。」
資深攝影師Leo：「一向PowerShotG系列嘅口碑都唔錯，今次G3亦冇令人失望，最緊要係配Adaptor後可用番G2嘅鏡頭，唔使換過晒啲鏡頭咁肉刺。」
今次PowerShotG3跟舊型號G2外形分別不大，整體嚟講加重進階拍攝功能為主，最基本嘅CCD感光元件同樣為400萬像素級，最大改進反而係鏡頭設計方面。首先鏡頭口徑比G2更大，集光率相對較高，相片成像當然好得多。另外光學變焦鏡頭由三倍跳升至四倍，配合數碼便可達14倍變焦效果，拍攝遠景一流。F2.0特大光圈亦係重要賣點之一，比市面一般機種嘅F2.8更大。特大光圈主要有兩個用途，第一係較暗環境都可吸取更多光源，快門速度毋須太慢；另外亦可更易做到淺景深效果，擺脫數碼相機「全Sharp」嘅弊病，相信呢幾項改進會更加吸引一班用家升級新機。
新機在記憶體及電源方面不變，同樣採用CFTypeI及II記憶卡，專用鋰電亦同G2一樣，不過由於DIGIC晶片另有降低電壓作用，故此PowerShotG3耗電量更低，同一電池使用時間更長，以開啟LCD屏幕計算，G2約可拍攝400張相，而G3則提升13%，達到450張。機身設計驟眼望亦跟舊機分別不大，不過G3嘅手揸位更為突出，單手舉機拍攝都好穩定。而閃燈熱靴同樣支援TTL測光，若配同廠閃燈，便可做到E-TTL效果。
除改良鏡頭外，PowerShotG3另一重要進化，係加入一粒名為DIGIC嘅處理晶片，以獨立方式幫忙運算，內附七大主要處理程序，當中包括壓縮、控制、抑噪、I/O等，情形就等於電腦嘅SCSI制式一樣，令整體運行速度更快，就算拍攝高解像相片及以最高壓縮率儲存，都比同級機為快，筆者實際測試時，分別以唔同壓縮率嘅四百萬像素拍攝，時間分別都不太大，結果畀到筆者一種爽快嘅操作感，對於熱愛攝影嘅用家嚟講更為吸引。
為使全自動模式下都有良好拍攝效果，G3加入Canon新iSAPS技術，簡單講即係機內已預設數千種唔同嘅拍攝環境數值，電腦懂得選擇最適當嘅光圈、快門等拍攝，就算全Auto拍攝都有好效果。
曝光準確，人物膚色自然，靠近背景亦做到淺景深效果。
記者意見：
抵讚：以價錢論，有F2.0大光圈的確吸引，獨立處理晶片亦直接增加操作爽快感。
要彈：有中級機嘅實力，可惜冇中級機嘅台型賣相，似入門機多啲。
Canon(HK)
查詢電話：23012468