排骨妹本來幾好命，佢個富豪男友大水喉唔單止好照顧佢，而且重照顧埋佢全家。大水喉喺排骨妹身上使嘅錢，可以用天文數字嚟形容，原因係排骨妹屋企唔單止親戚多，而且除咗佢媽咪爛賭之外，成家都爛賭。佢哋對錢嘅苛索程度，直情係無底深潭，好鬼恐怖。
大概喺十一、二年前，排骨妹個媽咪同大水喉講，話自己住喺外國嘅細佬想開餐廳，而且重可以申請埋其他親戚去外國。大水喉於是滙咗一千萬去畀佢，點知排骨妹個舅父根本冇將啲錢攞去開餐廳，而係去咗賭，賭三、四次就冇晒。
大水喉重喺外國嘅郊區買咗層別墅畀排骨妹個契媽，當年都要成三百幾、四百萬港紙，嗰陣時排骨妹可以話要風得風，要雨得雨，不過佢同男友分咗手之後，冇咗條大水喉照住，重俾啲爛賭親戚累到成副身家都冇晒，連樓都要賣埋。佢近年愈嚟愈瘦，好似捱得好辛苦咁，馮仁昭都戥佢慘！
岑建勳同老婆謝寧，前晚帶住兩個女出現赤鱲角機場。問佢哋喺邊度返嚟？岑建勳話：「我哋出席完米蘭影展，啱啱喺嗰邊返嚟。」岑建勳重好關心記者喺機場度等邊個。佢哋一家四口影完晒相，同記者傾完偈就匆匆離開。
樂壇有錢仔歌手，一出道冇耐就有好多歌迷，有消息指佢班歌迷係請返嚟嘅「臨記」。佢嘅唱片公司成日話有錢仔歌手隻碟好好賣，其實都唔知係真唔係真？事緣馮仁昭早排喺中環HMV見到佢去買番自己隻新碟，一買就係八十隻，相信都係用嚟送畀親朋戚友。有錢仔歌手送禮順便催谷銷量，真係一舉兩得！
無綫新劇《齊天大聖孫悟空》同亞視新劇《法內情2002》都喺噚晚首播，李燦森（Sam）同恬妞咁啱兩套劇都有份拍，不過連日嚟佢哋都只係宣傳《法》劇。噚日又去新城電台繼續宣傳。阿Sam重話：「套《法內情2002》收視好，我可以露兩點。」至於恬妞就話：「我次次病住去宣傳都有好收視，我噚日先發燒，所以《法內情2002》一定有好收視。」
港姐冠軍林敏俐、胡家惠及嘉碧儀等噚日去尖沙嘴科學館出席活動，幾個港姐重同一班身穿民族服飾嘅小朋友合照。
林敏俐話將會同金牌司儀汪明荃、沈殿霞同鄭裕玲一齊主持台慶。不過，有指汪明荃佢哋總共有價值四千萬嘅首飾贊助，林敏俐就話：「我入行未夠半年，佢哋係阿姐，身份唔同，我冇首飾，所以唔會戴。」問林敏俐會着乜嘢衫主持台慶？佢話：「我有一套好靚嘅晚裝係粉紅色，重有件紫色皮草。」
關淑怡好耐都冇公開露面見人，佢上年年尾推出國語碟之後，本來話籌備緊出廣東碟，但到𠵱家都冇下文。關淑怡前晚入咗電視城任曾志偉嘅《吾係獎門人》嘉賓後，就同張燊悅、林曉峰同康子妮去咗佢平時好鍾意去嘅麻辣小喇叭食消夜，由點幾食到三點幾。其實關淑怡肯同咁多人去食消夜，都唔似外間講得咁孤僻啫！